Dr Dootetanz vo Basel

von Urs Widmer

Be Feehn, numme bi Feehn danke z Basel die Doote. Er isch e haisse Huch, wo die, wo läbe, nit gschpyre, kuum, villicht, ass si Kopfweh hän, e Migräne, ass s Härz flattert, dr Otem schtoggt. Sunscht kuum ebbis. Dr Feehn in Basel fäggt keim dr Huet vom Kopf. Mir Dooti aber wärde so ebbis wie facht läbändig, wenn is dr Feehn in d Gebei fahrt. Sogar unseri Schprooch, weiss Gott e dooti Schprooch, macht e baar läbändigi Gümp. Mr nämme-n-is an de Knochehänd und danke um unsere Brunne umme. Wär is gseht, die sirrende Schatte, macht, asser heim kunnt. Mit em Doote us Basel, wo danzt, isch mit gute Kirsi ässe. Scho schtregge mr d Ärm nach dr us, mir Doote, ass de mit is danzisch im Feehn, wo die Doote läbändig macht und die Läbändige doot.


Zurück